ايريال دايما يوفى بوعده

يا جماعة لبنان فى خطر كبير جدا حزب الله المدعوم من ايران عمل انقلاب واستولى على بيروت وبيروت دى مش اى عاصمة عربية لا تقولى بغداد ولا دمشق ولا حتى القاهرة كفاية بس كباريهات شارع الحمرا واللى بتورد اجود اصناف البنات من هيفا وهبى الى دومينيك الخ الخ
عشان كده لازم وزرائنا يجروا على جناح السرعة الى لبنان خوفا عليها من الفتنة الطائفية وخوفا على تيار المستقبل و تيار الماضى وكمان الامر صحيح مجروش ايام لما كانت بتندك لبنان بالقنابل لان الجرى وسط القنابل صعب حسب اخر الابحاث العلمية لمعهد ssss للدراسات القنابلية وكمان الجرى من غير ما امريكا تقول ابدا حرام شرعا , طبعا لازم دولنا السنية توقف تقدم حزب الله الشيعى الوحش اللى عاوز يموت السنة وطبعا مافيش حد بيخاف على السنة واهلها زى ابو الغيط مثلا وزير خارجية مصر ( ده وزير خارجية مصر اللى قالوله اقطع العلاقات مع هولندا قال عشان حتة فيلم) لا وزى حكوماتنا اللى تموت ولا تلاقى حد بس يعطس فى وش السنة بس انا بدى اسال لو كان الشيخ سعد الحريرى (اه والله بيقولوا عليه كده فى لبنان باعتبار ان الى بيقول انه مسلم فى لبنان يعتبر متدين لدرجة التزمت) لو كان سعد الحريرى بيمثل السنة ييبقى مين بيمثل الشيطان ؟
و لا وايه مصر مش عاجبها ان الانقلاب ده ضد الديمقراطية و دولة المؤسسات يا نهار اسود هو مصر فيها مؤسسات ديمقراطية اصلا
الا اذا كانوا يقصدوا مؤسسة الحج محمد وشركاه للاعلاف يبقى احنا دولة مؤسسات فعلا .
اللى يغيظك جرايد الحكومة نزلت سلخ فى حزب الله كلها فى وقت واحد ( روز اليوسف- الاهرام - الاخبار - الجمهورية _.....) وكأن حزب الله هو اللى بيحتل العراق وفلسطين وافغانستان وطبعا يظهر مفكرين امثال سعيد برعى و مصطفى حبلص وتامر امين ابو وردة على الخدين بتاع البيت بيته تؤكد مدى خطر ايران ( لا انكر خطرها على السنة فعلا) متجاهلين ان في ناس لسه بايعة الغاز بتراب الفلوس لولاد صهيون ومتجاهلين خطر دولة تعبانة كده اسمها اسرئيل وده بيؤكد ان كله عند العرب صابون بس مش تبع ايريال لان احنا بنقاطع ايريال لحد ما اسرائيل تفلس وتبقى على الحديدة حيث ان اقتصاد اسرائيل يقوم على شيئين لا ثالث لهما الكوكاكولا والايرال ايريال هوو هووو .

يا من تدخلون الى كلية العلوم اتركوا ورائكم كل امل

من هنا بأذن الله نبدأ وان شاء الله ننتهى , باختصار شديد ومخل , انا اتخرجت من كلية علوم جامعة عين شمس قسم فيزياء بتقدير جيد , وللاسف اللى انشأ القسم ده كان فاكر ان اللى هيدخله وارث عمارتين فى مصر الجديدة وعنده شركة حديد نازلة احتكار فى الحديد فشر احمد بيه عز , و مش محتاج انه بعد ما يتخرج انه يشتغل وياخد فلوس وذلك تبعا للقاعدة العلمية القائلة ان العلم لا يكيل بالباذنجان و التى ارساها الفذ عادل امام ( مفكر عملاق من عصر الطباشير الملون) و هكذا بعد ان ناضلت فى كلية العلوم ستة اعوام ( كالستة اعوام التى بنت مصر فيها جيشها بعد النكسة) و رحت الهايكستب خمس ست مرات عشان اخد شهادة الاعفا وجدت ان الشغلانة الوحيدة هى انى اكون فنى اشعة فى مركز اشعة طبعا ولما كانت الشغلانة غاية فى الامان ( توقع ان يتم تدمير جسمك خلا 4 سنوات من الاشعاع) ومجزية جدا (400 جنيه فى 12 ساعة يا بلاش يعنى اقف بقال احسن) وكمان مستواها الاجتماعى عالى جدا ( فنى اشعة على وزن المدرب الفنى للمنتخب من المصدر الثلاثى فونفن و كلنا فنيين) فقد رفضت وانا ابكى بالدم ( لولو لولولى) لان ليس بالخبز المدعم فقط يحيا الانسان و ادينى قاعد مستنى جودو الذى لا يجيىء لانه مشغول فى السنترال بتاعه و سلاحى لقتل الوقت هو تعذيب الناس بمدونات من النوع الذى تقرؤه فسؤال للى والدته دعية عليه وقرا المدونة استمر فى التعذيب اقصد الكتابة ولا لا؟ و لتسهيل الامر وضعت اختيرات هى:
استمر طبعا.
استمر طبعا طبعا.

كل ماسبق طبعا.